தங்கத்தில் முதலீடு செய்தவர்களுக்கு அதிர்ச்சி : 17 ஆண்டுகளில் இல்லாத மிகப்பெரிய மாதாந்திர வீழ்ச்சி!

உலகளாவிய ரீதியில் தங்கத்தின் விலை இந்த மார்ச் மாதத்தில் முன்னெப்போதும் இல்லாத அளவிலான பெரும் வீழ்ச்சியைச் சந்தித்துள்ளது.

இன்று (31) விலையில் சற்று உயர்வு தென்பட்ட போதிலும், கடந்த 17 ஆண்டுகளில் இல்லாத மிக மோசமான மாதாந்திர வீழ்ச்சியாக இது பதிவாகியுள்ளதாக ரொய்டர்ஸ் ஊடகம் செய்தி வெளியிட்டுள்ளது.

இன்று சர்வதேச சந்தையில் ஸ்பொட் தங்கம் (Spot Gold) ஒரு அவுண்ஸ் 4,550.68 டொலர் ஆக 0.9% அதிகரித்துள்ளது.

இந்த மார்ச் மாதத்தில் மட்டும் தங்க விலை 13% க்கும் அதிகமாகக் குறைந்துள்ளது. இது 2008-ஆம் ஆண்டு ஒக்டோபர் மாதத்திற்குப் பிறகு ஏற்பட்ட மிகப்பெரிய மாதாந்திர வீழ்ச்சியாகும்.

மத்திய கிழக்கு நாடுகளில் நிலவும் போர் காரணமாக முதலீட்டாளர்கள் பாதுகாப்பான முதலீடாக டாலரை (US Dollar) தேர்வு செய்ததே இந்த வீழ்ச்சிக்கு முக்கியக் காரணமாகும்.

மேலும், பணவீக்கம் மற்றும் வட்டி விகிதங்கள் உயரும் என்ற எதிர்பார்ப்பும் தங்கத்தின் மீதான ஆர்வத்தைக் குறைத்துள்ளது.

கடந்த ஜனவரி 29 அன்று தங்கம் ஒரு அவுண்ஸ் 5,594.82 டொலர் என்ற வரலாற்று உச்சத்தைத் தொட்டது.

ஆனால் தற்போது அந்த விலையிலிருந்து சுமார் 18.70% விலை குறைந்துள்ளது.

எண்ணெய் விலை உயர்வு மற்றும் ஹோர்முஸ் நீரிணை (Strait of Hormuz) மூடல் போன்ற காரணங்களால் தங்க விலையில் ஏற்ற இறக்கங்கள் தொடரலாம்.

இருப்பினும், 2026 இறுதிக்குள் தங்கம் ஒரு அவுன்ஸ் 5,400 டொலரை எட்டும் என கோல்ட்மேன் சாக்ஸ் (Goldman Sachs) கணித்துள்ளது.

மேலும் வெள்ளி, பிளாட்டினம் மற்றும் பல்லேடியம் ஆகிய உலோகங்களின் விலையும் இந்த மாதத்தில் தலா 20% வரை குறைந்துள்ளன.