11-வது முதல் 13-வது வரையிலான ஜார்க்கண்ட் அரசுப் பணியாளர் தேர்வாணைய (ஜேபிஎஸ்சி) தேர்வுகள் மூலம் பணியமர்த்தப்பட்ட அரசு ஊழியர்களின் நியமனங்களை ரத்து செய்யும் மாநில அரசின் அறிவிப்புக்கு ஜார்க்கண்ட் உயர் நீதிமன்றம் இடைக்காலத் தடை விதித்துள்ளது.
ஜார்க்கண்ட் மாநிலத்தின் அரசுப் பணியாளர் தேர்வாணையம் நடத்திய சிவில் சர்வீசஸ் தேர்வு, ஜேஎஸ்எஸ்சி உள்ளிட்ட தேர்வுகளில் வினாத்தாள்கள் முறைகேடுகள் நடந்திருப்பதாகக் குற்றஞ்சாட்டி, 3 வாரங்களுக்கும் மேலாக தலைநகர் ராஞ்சியில் மாணவர்கள் போராட்டம் நடத்தினர்.
போராட்டத்தின்போது போராட்டக்காரர்களுக்கும் காவல் துறையினருக்கும் இடையே கடும் மோதல் வெடித்தது. போராட்டம் தீவிரம் அடைந்ததால் ஜார்க்கண்ட் முதல்வர் ஹேமந்த் சோரன் தலைமையில் அமைச்சரவைக் கூட்டம் கடந்த 17-ம் தேதி நடைபெற்றது.
இந்தக் கூட்டத்தில், கடந்த 2014-ம் ஆண்டு முதல் டிஎஸ்ஆர் டேட்டா பிராசஸிங் நிறுவனம் என்ற ஒப்பந்த நிறுவனம் மூலம், மாநிலத்தில் நடத்தப்பட்ட அனைத்து வேலைவாய்ப்புத் தேர்வுகள், ஜேஎஸ்எஸ்சி – சிஜிஎல் தேர்வு ஆகியவற்றை ரத்து செய்ய மாநில அரசு முடிவு செய்துள்ளதாக முதல்வர் ஹேமந்த் சோரன் அறிவித்தார். இதனால், மாணவர்கள் தங்களது போராட்டத்தைத் திரும்ப பெறுவதாக அறிவித்தனர்.
ஜார்க்கண்ட் அரசின் இந்த அறிவிப்பு காரணமாக, கடந்த 12 ஆண்டுகளில் அரசுப் பணிக்கு தேர்ந்தெடுக்கப்பட்ட 2,600-க்கும் மேற்பட்டோர் தங்கள் வேலைகளை இழக்கும் அபாயம் ஏற்பட்டது.
இதன் காரணமாக அரசின் இந்த அறிவிப்புக்கு எதிராக அவர்கள் போராட்டத்தில் ஈடுபட்டனர். அரசு தனது முடிவை மறு பரிசீலனை செய்ய வேண்டும் என்று அவர்கள் வலியுறுத்தினர்.
அவர்களில் சிலர், அரசின் முடிவை எதிர்த்து ஜார்க்கண்ட் உயர் நீதிமன்றத்தில் மனுக்களைத் தாக்கல் செய்தனர்.
தேர்வு முறைகேடுகள் குறித்த விசாரணையை தாங்கள் எதிர்க்கவில்லை என்றும், ஆனால் ஒட்டுமொத்த தேர்வையும் ரத்து செய்வதை தாங்கள் எதிர்ப்பதாகவும் அவர்கள் தெரிவித்தனர்.
திறமையின் அடிப்படையில் தேர்ந்தெடுக்கப்பட்டவர்களுக்கு எதிராக நடவடிக்கை எடுக்கப்படக் கூடாது என்றும், முறைகேடுகளில் ஈடுபட்டதாகக் கண்டறியப்பட்டவர்கள் மீது மட்டுமே நடவடிக்கை எடுக்க வேண்டும் என்றும் அவர்கள் வாதிட்டனர்.
இந்நிலையில், ஹேமந்த் சோரன் அரசின் அறிவிப்புக்கு ஜார்க்கண்ட் உயர் நீதிமன்றம் இடைக்காலத் தடை விதித்துள்ளது. உயர் நீதிமன்றத்தின் இந்த தடையை, மனுதாரர்கள் வரவேற்றுள்ளனர்.
