மாலைதீவுக்கு செல்லும் இலங்கை பிரஜைகளுக்கு இலவசமாக 90 நாட்களுக்கு வருகை (On Arrival) சுற்றுலா விசா வழங்குவதற்கு மாலைதீவு அரசாங்கம் தீர்மானித்துள்ளது.
ஜனாதிபதி அனுரகுமார திசாநாயக்கவின் மாலைதீவு விஜயத்துடன் இணைந்ததாக இந்த தீர்மானம் எடுக்கப்பட்டுள்ளதாக ஜனாதிபதி ஊடகப்பிரிவு தெரிவித்துள்ளது.
இந்த விசா வழங்கல் திட்டம் நேற்று (29) முதல் அமுலாகும் வகையில் செயற்படுத்தப்பட்டுள்ளது.
இந்த விசாவை பெறுவதற்கு, செல்லுபடியாகும் கடவுச்சீட்டு மற்றும் மாலைதீவில் தங்கியிருக்கும் காலப்பகுதியில் செலவிடுவதற்கு போதுமான பணம் என்பவற்றை கொண்டிருப்பதை உறுதிப்படுத்த வேண்டும்.
இலங்கையுடனான விசா வசதிகளை வழங்குவது தொடர்பான உடன்படிக்கையின் நிபந்தனைகள் மற்றும் மாலைதீவு குடிவரவு சட்டவிதிகளின்கீழ், இரு நாடுகளுக்கும் இடையிலான ஒத்துழைப்பை நோக்கமாக கொண்டு இந்த நடவடிக்கை எடுக்கப்பட்டுள்ளதாக மாலைதீவு அரசாங்கம் தெரிவித்துள்ளது.
