அலோர் ஸ்டார், ஜாலான் டத்தோ கும்பாரில் அமைந்துள்ள தித்தி மெகா குளத்தில் கடந்த சில தினங்களுக்கு முன்னர் பாரிய மீன்பிடிப் போட்டியொன்று மிகவும் கோலாகலமாக நடைபெற்றது. ஒரு மில்லியன் ரிங்கிட் (RM1 Million) எனும் பாரிய ரொக்கப் பரிசை இலக்காகக் கொண்டு நடாத்தப்பட்ட இந்தப் போட்டியில், மலேசியாவின் பல்வேறு மாநிலங்களிலிருந்தும் சுமார் 15,000-க்கும் மேற்பட்ட மீன்பிடி ஆர்வலர்கள் கலந்துகொண்டனர்.
இப்போட்டியின் இறுதி முடிவுகளின்படி, 9.5 கிலோ எடையுள்ள கெளுத்தி மீனைப் பிடித்த திரெங்கானு மாநிலத்தைச் சேர்ந்த வீரர் முதலிடத்தைத் தட்டிச் சென்றார். இதன் மூலம் அவர் ஒரே நாளில் ஒரு மில்லியன் ரிங்கிட் பணத்தை வென்று கோடீஸ்வரரானார்.
அவரைத் தொடர்ந்து, 8.5 கிலோ எடையுள்ள மீனைப் பிடித்த மற்றுமொரு திரெங்கானு வீரர் இரண்டாம் இடத்தைப் பெற்று 100,000 ரிங்கிட் பணப்பரிசைப் பெற்றுக்கொண்டார். அதேவேளை, 8 கிலோ எடையுள்ள மீனைப் பிடித்த சிலாங்கூர் மாநிலத்தைச் சேர்ந்த வீரர் மூன்றாம் இடத்தைப் பெற்று 50,000 ரிங்கிட் பணப்பரிசைத் தனது வசமாக்கிக் கொண்டார்.
வெற்றியாளர்களுக்கு வழங்கப்பட்ட இந்த பாரிய பரிசுத் தொகை காரணமாக, நாட்டின் மூலை முடுக்குகளில் இருந்தெல்லாம் மீன்பிடிப் பிரியர்கள் 220 ரிங்கிட் நுழைவுக் கட்டணத்தைச் செலுத்தி ஆர்வத்துடன் களமிறங்கியிருந்தனர். மேலும், போட்டியில் கலந்துகொண்ட ஏனையோரை உற்சாகப்படுத்தும் நோக்கில் 700-ஆவது இடம் வரை வந்தவர்களுக்கு ஆறுதல் பரிசுகளும் வழங்கப்பட்டன.
மலேசியாவின் ‘காகி பஞ்சிங்’ (Geng Kaki Pancing) சமூகத்தினர் மத்தியில் இந்தப் போட்டி ஒரு வரலாற்றுச் சாதனையாகப் பார்க்கப்படுகிறது.
